Այսօր ավարտվել են Արագածոտնի մարզի Սբ. Խաչ եկեղեցու ջեռուցման համակարգի ներդրման աշխատանքները: Ինչպես տեղեկացրին «ՎիվաՍել-ՄՏՍ» ընկերությունից, եկեղեցում ջեռուցման համակարգի անցկացումն ու կաթսայատան կառուցման համար ընկերության սոցիալական ներդրումը 12 մլն դրամ է կազմել:
Սբ. Խաչը, որ տեղացիներն անվանում են Քասախի բազիլիկ, 4-րդ դարի բազիլիկ եկեղեցի է: Խորանում պահվում է սուրբ պսակի մի մասունք: Դարեր ի վեր այս եկեղեցին եղել է առ Աստված սուրբ աղոթքի վայր: Տեղեկատվության համաձայն, երբ 2001 թ. եկեղեցին վերանորոգվել է, այն վերգտել է իր նշանակությունը` մարդկանց միավորելու, հավատքով լցվելու և հոգևոր կրթություն տալու գործառույթը: Սակայն Արագածոտնի մարզին հատուկ ցրտաշունչ ձմեռները ժամանակավորապես դադարեցնում են եկեղեցու գործունեությունը: Եվ քանի որ եկեղեցին յուրահատուկ է, պետք էր ջեռուցում ապահովել այնպիսի միջոցներով, որոնք չէին խաթարի հնամենի կառույցի ամբողջականությունը: «Մեր եկեղեցին դարերով կատարել է ժողովրդին համախմբելու, հայկականությունը պահպանելու կարևորագույն գործը: Մենք, որպես կորպորատիվ քաղաքացի, այսօր պարտավոր ենք մեզ հասած այս հոգևոր և մշակութային ժառանգությունը պահպանել, ստեղծել հնարավորություն, որ մարդիկ պարբերաբար շփվեն այդ մշակույթի հետ և որ այդ գործընթացը լինի անընդհատ»,- նշել է «ՎիվաՍել-ՄՏՍ»-ի Գլխավոր տնօրեն Ռալֆ Յիրիկյանը:
Няма коментари:
Публикуване на коментар